Recuncho Gamer

Recuncho Gamer é un proxecto audiovisual creado por Iago Gordillo que procura a divulgación de forma amena sobre os videoxogos, entendendo a estes como un produto cultural. Trátase da primeira proposta audiovisual feita en exclusiva para Twitch e YouTube que opta a uns Premios Mestre Mateo. Por Recuncho Gamer pasaron persoeiros como as Tanxugueiras, o equipo do Malicia Noticias e do Como que non Radio, ou outros creadores de contido como os galegos Álex Fidalgo e SpineCard ou Blissy. É a canle de YouTube en galego sobre videoxogos máis vista no ano 2021, sendo ademais gañadora dun premio pioneiro no certame Youtubeiras e finalista nos premios Devuego 2021 como Mellor Medio Audiovisual a nivel español. Tamén é unha das 10 canles máis vistas e seguidas no Twitch en galego cos seus directos e é a canle de videoxogos con mellor media de espectadores, ademais da primeira en ter un sistema de subtitulaxe en directo en galego. O proxecto suma máis de 200.000 visualizacións dos seus contidos en 14 meses, máis de 150 vídeos no YouTube e suma máis de 4.000 seguidores nas distintas redes sociais. Esta proposta complétase con colaboracións puntuais con entidades coma o Museo do Videoxogo, na creación dun evento de música de videoxogos, ou na creación dunha tenda con deseños de videoxogos adaptados á indiosincrasia galega.